S Goms isch nid numen es Mekka für aui Langlöifer – es isch ou es wunderschöns Wander-gebiet ! Das hei mir 17 Teilnämer i üser tolle Wanderwuche chönnen erläbe und gniesse: mir hei i zwonen Etappe dr ganz Gommer Höhewäg vo Oberwald bis Bellwald dürwanderet, wo insgesamt 30 km läng isch und unzähligi Höhemeter uf und ab geit. Vom Höhewäg us hei mer uf di hübsche, urchige Walliserdörfer abegseh, und di mächtigi Pyramide vom Wysshorn het uf em ganze Wäg üsi Blicke wie ne Magnet azoge. De si mer uf 3 Gipfu gstange: uf em Risihorn 2876 m oberhalb vo Bellwald; s Brudelhorn 2790 m hei mer i zwone Gruppe bestige: di einte si diräkt vo Münster i 1400 HM uf e Gipfu, während di angere vo dr Nufene-stross us dürs Lengtal gwanderet si und uf em Gipfu obe hei mer üs troffe ! Ou s Sidelhorn 2764 m hei mer i zwone Gruppe bezwunge: di einte vo Oberwald us (e längen Ufstig, ou wider 1400 HM), und di angere vom Grimselpass. Vo aune 3 Gipfu us hei mer e grossartigi Rundumsicht gha – kei Wunger, bi däm herrleche Wätter! Am letschte Tag si mer vo Ulriche höch obedüre (Mällige2293 m) nach Oberwald gloufe und hei dr Tiefblick übers ganze Obergoms gnosse und natürlech dr dominierend Galestock bewunderet.
A propos Ulriche: dört si mer di ganzi Wuche im Hotel stationiert gsi, wo vo sim Chef und sinere Partnerin prägt wird: was üs dä Andi aues botte und ou nützlechi Tips gäh het – unvergässlech!
Näbsch auem wandere isch d Kultur vom Goms nid z churz cho: am erschte Nomittag hei mer e professionelli Füerig dür Obergesteln gha und vernoh, worum das Dorf (s einzige im Goms) usschliesslech us Stei- und nid Holz-Hüser bouet isch. De hei mer öppis übere Cäsar Ritz ghört, wo in Niederwald ufgwachsen isch und als „König der Hoteliers und Hotelier der Könige“ i d Gschicht ygangen isch. Und am letschten Obe het dr Andi si Oldtimer-Hürlima
vor si Rössliwage „gspannt“, üs uf em Wage es Bomben-Apéro ufgsteut und eso rund um Ulriche zoge. Bir Chile si mer aui usgstige, yträtte, dr Andi setzt sech a d Orgele und bietet üs es einmaligs Orgelekonzärt!.... Das isch aune tief unger d Hut ygfahre!....
Öpper het nachhär ganz träffend gseit: „Esone Tuurewuche chame nümm toppe.
Annette
⇐
