Uf mehrfache Wunsch het dr Ruedi di Wanderig wider is Programm gno !
Vo Ringgebärg isch es boutzgredi ufe gäge Brienzergrat gange: zerscht relativ süüferli dür e Waud, de dürs Graaggetoor düre und s letschte Stück de rächt s …weiterlesen

Uf mehrfache Wunsch het dr Ruedi di Wanderig wider is Programm gno !
Vo Ringgebärg isch es boutzgredi ufe gäge Brienzergrat gange: zerscht relativ süüferli dür e Waud, de dürs Graaggetoor düre und s letschte  Stück de rächt steil ufe Grat. Gäng het üs der Tiefblick uf e smaragd-farbig Brienzersee und ufs Bödeli fasziniert. Du si mer bim Hüttli aacho: wau!- isch das es BIJOU !! Mir hei es feins z’Nacht bröselet und en unvergässlechen Obe verbrocht!
Am angere Morge si mer über alle Grat zerscht uf e markant Suggiture gloufe und hei ou vo dört us e tolli Ussicht uf e See gha – sofern üs d Näbufätze dr Tiefblick erloubt hei. Ou dr Blick uf die höche Bärge het me sech müesse verdiene: nume churz isch auben es Fänschter ufgange. Hingäge d Bluemepracht hei mer gäng chönne gniesse, houptsächlech das immänse Meer vo Ankebäui! Du si mer witer gäge s Augstmatthorn gwanderet und hei ungerem Gipfu die erschte Steiböck gseh, wo sech de öppe gar nid hei lo störe. Uf em Gipfu obe si mer vo Mueter und Chliinem Gemsi empfange worde: zerscht hei mer nume di chliine Hörnli gseh wi vo mene Tüüfeli.
Dr Abstig gäge Habchere isch dank nöi agleitem Wäg prima gange – gäng het üs di troumhafti Bluemepracht fasziniert: vor Soldanelle bis zur Auperose hei mer s ganze Spektrum gseh. Und was mer ou gseh hei: es Schneehuen, es stoutzes Adlerpaar und … e Birkhahn!
Im Name vo 11 SACler danken i am Ruedi, dass er die wunderschöni Wanderig no einisch düregfüert het.
Annette