Nachdäm mer letscht Johr di erschte zwo Tages-Etape vo dere geniale Fern-Wanderig zrügg gleit hei, het dr Kobi Rösch hüür Etape 3 und 4 is Programm gno.
So si mer am 18. Juni in Bonfol gstartet, wo mer letscht Johr ufghört hei. …weiterlesen

Nachdäm mer letscht Johr di erschte zwo Tages-Etape vo dere geniale Fern-Wanderig zrügg gleit hei, het dr Kobi Rösch hüür Etape 3 und 4 is Programm gno.
So si mer am 18. Juni in Bonfol gstartet, wo mer letscht Johr ufghört hei. Zum Glück si mer gly i Waud cho: erschtens isch es dört e chli chüeler und zwöitens überus spannend gsi: nach de 3 aute Gränzsteine, wo für d Schwyz (CS = Confédération Suisse !!), Frankrych und Dütschland stöh (s Elsass het vo 1871 bis 1919 zu Dütschland ghört), si mer lang a dr Schyzerisch-Französische Gränze no gloufe und hei di vile schöne Gränzsteine bewunderet, wo uf dr einte Syte es F oder RF hei, uf dr angere Syten aber meischtens dr Bärner Bär sichtbar isch. Dür Fäud und Waud si mer gägen Obe in Boncourt ygloufe, wo no hüt z.T. vo dr Tubak-Industrie (Burrus) läbt. Im Airbnb si mer grossartig empfange worde, und dr Husbsitzer het üs ou no grad informiert, a was für nere gschichtsträchtige Stöu sis Hus steit: 10 Meter näbedra isch ou e ganz e wichtige Gränzstei! Mi si du ganz fridlech nach Frankrych übere go z Nacht ässe.
Am angere Tag het üs dr Wäg zerscht am Bach „Allaine“ no gfüert, du a  riiisige (!)  Fäuder, wo der Mohn useglüchtet het, und ou wider a früsch apflanztem Tubak verby. Vom Waffeplatz Bure hei mer numen akustisch öppis mitübercho. Und so isch üses Grüppli munter und berycheret vo aune nöjen Ydrück in Grandfontaine, üsem hüttige Zyl, acho.
Kobi, aui Teilnämer säge dir „1000 Dank“, dass du ou die zwo Tages-Etape so tiptop vorbereitet hesch. Bis zum nöchschte Johr !?!                                                                    

Annette