Es isch e bsungeri Tuur gsi: d Wätterfrösch hei am Tag vorhär mit ihrne Prognose mächtig dernäbe greckt! Wo mer am 9.15 uf Sunnbüel us dr Station use sy, het üs dr Föhn, wo erscht ab em Mittag hätt söue blose, scho fasch d Luft …weiterlesen

Es isch e bsungeri Tuur gsi: d Wätterfrösch hei am Tag vorhär mit ihrne Prognose mächtig dernäbe greckt! Wo mer am 9.15 uf Sunnbüel us dr Station use sy, het üs dr Föhn, wo erscht ab em Mittag hätt söue blose, scho fasch d Luft abgstöut. Mir si buechstäblech vom Föhn und vom ufgwirblete Schnee gsandstrahlet worde, bis mer umen Egge vom Sagiwaud (P. 2004) gloufe si. Vo dört a hei mer en absoluti Gnusstuur gha, wo zum Teil no richtig d Sunne gschine het. Und uf em Gipfu het me kes Lüftli gspürt! Dr oberscht Hang isch nid grad es Vergnüege gsi: blank gfägt und pickuhert. Aber dr Räscht vor Abfahrt isch rächt passabel gsi, bis mer wider i Windkanau grote si…. Zrügg uf Sunnbüel … isch ke Mönsch me ume gsi! Müesse mer jetz no bis Kanderstäg abefahre?? Nachdäm dr Ruedi mit öpperem vo dr Bahn telefoniert het, isch du doch no ei Service-Ma derhär cho, wo jo ouno het wöuen abefahre. Villecht isch är du no froh gsi, dass mir 10 Oberaargouer dr Gondle e chli meh Gwicht hei gäh. Danke, Ruedi, dass du die Tuur dürezoge hesch!
PS: d Fotografin het nume Schönwätterbüudeli gmacht: bim Föhnsturm hets mi nid gluschtet, d Händschen abzzieh und d Kamera vüre z näh.

Annette