Tuurebricht zwöitägigi Wanderig im Waadtländerjura 16./17. Juni 2022
Natur – Kultur – Literatur hei di wunderschöni und üsserscht abwächsligsrychi zwöitägigi Wanderig prägt. Aber … göh mer der Reihe no:
Usgänds La Sarraz (noch bi Lausanne) si mer zur „La Venoge“ gstosse, dä Bach, wo dr Jean Villard-Gilles zum glychnamige Gedicht inspiriert het. Un fleuve? En tout cas, c’est de l’eau qui coule à un joli niveau, et c’est tout vaudois . Mir si dür ne fasch märlihafti Landschaft am Bach no gloufe und hein üs vom ene richtige Wasserfau lo überrasche. Du hei mer s Tau vo dr Venoge verloh und, bevor mer zum nächschte Bach cho si, het üs dr Kobi druf ufmerksam gmacht, dass mer jetz a dr Wasserscheidi Mittelmeer / Nordsee stöh : d Venoge «quand elle a vu l’Orbe, sa sœur, filer tout droit sur Yverdon vers Olten, elle a dit : «Pardon ! Le Nord, c’est un peu froid pour moi. J’aime mieux mon soleil vaudois !» Et elle finit par se fondre amoureusement entre les bras du bleu Léman, la Venoge. » Dr Nozon, dr nächscht Bach, wo äbeso nes romantisches, verspüuts Tau i Jura ine gfrässe het, isch üse Begleiter gsi bis Romainmôtier. Dört hei mer, trotz Hitz und Durscht, die wunderschöni, über 1000 Johr (!) auti, fasch unverändereti und wytumenang bekannti Chloschterchile uf üs lo ywürke. Nach emene churze Marsch und ere churze Ysebahnfahrt si mer in Vallorbe acho, wo mer im ene reizende Hotel erwartet worde sy. Zum z’Nacht hei di meischte Forälle g’wünscht – nach so vüune Bech, wo mer erläbt hei. Und wi schribt dr Gilles vo dr Venoge: Elle cour avec des frissons. Ça la chatouille, ces poissons.
S Zyl vom zwöite Tag (d Dent de Vaulion 1483 m) hei mer vo Vallorbe us erstuunlech gly erreicht: e churzwilige Wäg, meischtens em Schatte noh, het üs gäbig uf herrlechi Jura-Weide gfüert, und scho hei mer …. W A U ! !... e grandiosi Ussicht uf e Lac de Joux und sis ganze Tau gha. Ou d Waadtländer Aupe hei sech zeigt – leider het üs dr Dunscht d Sicht uf di ganz Grosse verhinderet. Aber d Dent de Vaulion bietet würklech es 360°-Panorama, wi mes säute cha erläbe.
Dr Abstig nach le Pont isch schneidig gange – äbe so dr gross Durscht lösche und … di ganzi Heireis.
Im Name vo Vreni, Margrit, Rosmarie, Elisabeth, 2x Heinz, Roli und Ruedi danken i am Kobi härzlech für di tolli, beschtens (!) organisierti Tuur in e Gägend, wo sicher nume weni Oberaargouer kenne. Annette
⇐